Appell għall-Għajnuna mill-Missjunarji Dumnikani fl-Albanija

Fl-ewwel ġimgħat tas-sena 2026, il-Missjoni Dumnikana fl-Albanija ntlaqtet minn prova iebsa. Xita qawwija u bla waqfien ġabet magħha ħsarat kbar li ħallew impatt profond fuq il-ħajja ta’ kuljum tal-Aħwa Dumnikani u fuq il-ħidma pastorali tagħhom fost il-poplu Albaniz.

Faċilitajiet li għal snin sħaħ kienu spazju ta’ tama, edukazzjoni u formazzjoni issa jinsabu fi stat devastanti. Xi wħud minn dawn huma:

• Il-Parroċċa ta’ San Duminku u ċ-Ċentru Parrokkjali, inklużi l-klassijiet tal-katekizmu u tal-formazzjoni;

• Id-dar tal-Aħwa Dumnikani Maltin;

• Il-Parroċċa ta’ San Ġorġ fl-Lagjja Mirdita;

• Vetturi u tagħmir essenzjali għall-ħidma pastorali, bħal kompjuters u apparat elettroniku;

• Kif ukoll ħsarat serji fis-sistema tad-dawl u s-sigurtà.

Dawn mhumiex biss ħsarat materjali. Huma ostakli reali għall-missjoni ta’ kuljum: li tingħata edukazzjoni, formazzjoni umana u spiritwali, u xhieda ħajja tal-Evanġelju fost komunitajiet li diġà jgħixu f’ċirkustanzi diffiċli.

Il-Parroċċa ta’ San Ġorġ fl-Lagjja Mirdita

Għalhekk, illum il-Missjunarji Dumnikani Maltin qed iduru lejn il-ġenerożità tagħkom. B’umiltà u fiduċja, qed jappellaw għall-għajnuna tal-poplu Malti u ta’ dawk kollha li għandhom qalbhom miftuħa għas-solidarjetà.

Kull donazzjoni — tkun kemm tkun, żgħira jew kbira — tista’ tagħmel differenza sinjifikanti. Tista’ tgħin biex jinbnew mill-ġdid dawn il-faċilitajiet, biex il-missjoni tkompli toffri spazji ta’ tama, tagħlim u fidi, u biex il-preżenza Dumnikana fl-Albanija tibqa’ ħajja u attiva.

Inroddulkom ħajr minn qalbna għall-ġenerożità, it-talb u s-solidarjetà tagħkom. Flimkien nistgħu nerġgħu nibnu dak li nqered u nkomplu nxerrdu dawl fejn bħalissa hemm biss dlam.

Id-donazzjonijiet jistgħu jintbagħtu permezz tal-kont bankarju tal-Provinċja  Dumnikana Maltija:

ACCOUNT NUMBER: 35572610029

IBAN: MT26APSB77013000000035572610029